Dixebra ta acabantes d’asoleyar de la mano de l’asociación cultural Xeira el discu “Versióis eonaviegas”. Nél, el grupu interpreta cuatro cantares del so últimu trabayu “Amor incendiariu” na llingua de los conceyos asturianos asitiaos ente’l Navia y l’Eo. “Xentuaya”, “Amor incendiariu”, “Quero ser ferro” y “Berra” son los cuatro temes tornaos a esta llingua col sofitu de Xeira, asociación que tien l’oxetivu de da-y puxu a la fala del eo-navia.

Na contraportada del discu, l’asociación esplica cuálos foron los motivos d’esti proyectu: «demostrarye á mocedá que se poden abrir camíos novos tamén prá nosa lingua». Presentáu con un formatu y un diseñu atractivu, esti discu supón toa una novedá nel repertoriu de la banda avilesina, porque ye la primer vez qu’interpreten dalgún tema n’otra llingua que nun sía l’asturiana.

La presentación d’esta novedá discográfica va facese’l sábadu 13 de febreru, na Casa de la Cultura de Bual (20:00 hores), nel actu d’entrega del Premio de Narracióis Curtias entamáu por Xeira. Nél va tar presente’l ganador de la última edición, Miguel Rodríguez Monteavaro, y Xune Elipe (van proyectase dos audiovisuales con dos de les canciones de Dixebra en gallego-asturianu). Amás d’eso, va abrise l’actu cola actuación del tríu de música tradicional Moxega.