“Chueve” de Brandal, “El Dinamiteru” de Dixebra, “El mio sitiu” de Lafu y Rebeca, “La casa’l mieu” de Misiva y “Tierra” de Xera, son los cinco finalistes al Premiu al Meyor Cantar 2009. Dientro de la gala d’entrega programada pal prósimu 20 de febreru va escoyese al ganador d’esti premiu organizáu pola Conseyería de Cultura y Turismu. Na Casa Cultura Teodoro Cuesta de Mieres a les 19.00 va tener llugar la gala, televisada pela TPA, na qu’actuarán caún de los nominaos.

“Esti Premiu al Meyor Cantar nació nel 2007 como una reconocencia a la creación musical”, asina presentaba Consuelo Vega, directora de Política Llingüística, la cuarta edición d’esti eventu, ún de los pocos que les instituciones públiques asturianes tienen pa cola so música y la so llingua. Anque solo haiga cinco finalistes, esta edición carauterizase pola bayura de cantares aspirantes a llevar el premiu yá que foron 21 los grupos asoleyaron discu nel 2009 con un total 106 temes.

Les persones vinculaes a la llingua y cultura asturiana Sofía Castañón y Anabel Santiago, los periodistes musicales Aurelio Argel y David Serna y el presidente de la fundación Liet; formen el xuráu que va decidir d’ente los finalistes al ganador. El premiáu col Meyor Cantar va recibir una escultura de Mª Xesús Rodríguez, tendrá apoyu discográficu y de conciertos de la Conseyería y va representar a Asturies nel festival musical de llingües minoritaries “Liet Internasjonaal”.

Destacaron tamién les palabres de Míguel, componente del grupu de folk electrónicu Xera. Teniendo anguaño continues noticies al rodiu’l mercáu discográficu y la propiedá inteleutal, Míguel resaltó’l trabayu d’autoedición que sigui Xera y consideró que la so nominación “ye un triunfu pa los grupos de músicos y músiques que deciden sacar la so obra con llicencies llibres”.