La mítica banda de punk xixonés Odio Visceral presenta’l sábadu 11 en directu’l so discu “Ye lo que hay”. Acompañaos polos sos grupos collacios de punk-folk Skontra y hardcore/punk Adizión Etílika, Odio Visceral actúen nel Savoy Drinks & Music de Xixón. A les 20.30 va entamar esti conciertu que lleva un preciu únicu de 4 €.

Pa conocer los comienzos d’Odio Visceral hai que remontase a 1994 y a la C.S.A xixonesa como llugar d’actuaciones y primeros conciertos. Con toos estos años con Kristian a la voz cantante, una montonera de componentes pasaron pela formación y, anque los conciertos tamién foron abondos, enxamás editaran nengún trabayu musical.

Anguaño presenten “Ye lo que hay”, el so primer discu. Siguiendo l’autoedición y el rechazu a la SGAE, esti trabayu ta formáu polos temes qu’esta banda suel tocar nos sos directos. Punk y rock amestáu a lletres antifacistes, llibertaries y crítiques cola situación d’Asturies y del mundu formen “Ye lo que hay”, discu que sal a la venta baxo un preciu de 6 €.