“Avientu 2009. Mes de celebraciones, d’alcuentros, de consumu, de más importaciones yankis col Papá Noel colgando les ventanes, d’aniversarios de Cartes Magnes feches “exemplarmente col consensu los demócrates”, d’amosar la voluntá popular y el derechu a decidir el futuru de los pueblos, de fuelgues de fame y mirades pa otru llau, de defender la cultura frente a la especulación… caliente vien esti mes del añu ¿Sedrá pol cambiu climáticu?”

Entama’l cursu. Atrás dexamos yá les vacaciones, les folixes de prau, les fiestes patronales y los festivales de branu. L’escelentísimu Ayuntamientu d’Uviéu ya-y pagó los más de 70.000 € a Isabel Pantoja pola so actuación en San Mateo y la SGAE torgó qu’esti setiembre se cellebrara una nueva edición del “Puelles Rock”. Más de 5000 € ye lo que-y reclama a los organizadores del festival autoxestionáu esta entidá. Llueu se definirán como defensores de la música y la cultura, pero torgar la celebración d’eventos d’esti nun ye lo más afayadizu si se quier espardir la música en direutu.